تعرفي علي ذبابه الفاكهه وطرق التخلص منها
تعرفي علي ذبابه الفاكهه وطرق التخلص منها
انا جايبالكم النهاردة بعد تجربة ناجحة والحمد لله طريقة التخلص من ذبابة الفاكهة الى اعتقد انها موجودة فى كل بيت ومزهقانا كلنا وخصوصا فى وجود الموز انا فعلا كنت هاتجنن مهما انضف المطبخ بتاعى برده الاقى الدبان الصغنون بتاع الفاكهة ده موجود ومغطى الموز بالذات لانى مبحطهوش فى الثلاجة وبعدين قعدت ابحث عن طريقة سهلة ومش مكلفة اتخلص بيها منه ولقيت كام طريقة بس انجحهم واسهلهم الطريقة دى
الطريقة :
1/2 كوب ماء 2 ملعقة كبيرة خل تفاح 2 ملعقة كبيرة سكر شوية بريل او اى صابون سائل ريحته نفاذة والمكونات اهى بالصور طريقة التخلص من المجرمة الملعونة ذبابة الفاكهه على فكرة ممكن الى معندهاش خل تفاح تبدله بالليمون او الخل الابيض المهم اى حامض او ممكن تهرس نص موزه مستوية وتحطها بس الافضل السوائل وكمان ممكن تزودى المقادير حسب حاجتك والكمية الى انتى عاوزاها يعنى ممكن تكونى هتستخدميها فى اكتر من مكان مثلا الحمام والمطبخ والاماكن الى موجودة فيها الذبابة المؤذية دى. تخلطى بقة يا ستى المقادير مع بعض وتحطيهم فى برطمان زجاج او بلاستيك مش فارقة وتغطي البرطمان بكيس وتربطيه كويس وانا بحب البلاستيك الرول ده الى بيلزق لوحده بجيبه علشان اغطى بيه بواقى الاكل فى الثلاجة فمتعملش اوتلقط اى ريحة وبعدين تخرمى الكيس خروم جنب بعضها علشان الذبابة
تشم الريحة تدخل من الخروم متعرفش تطلع تغرق تموووت هييييييييييه شريرة انا صح شريرة قوي
وعلى فكرة ممكن تحطيها بشكل جمالى فى الصالة او اى مكان ممكن تكونى بتستقبلى فيه الضيوف وتكون فيه برده ذبابة الفاكهه دى وصدقونى الطريقة دى فعالة جدا وبتجذب الذبابة دى ومبتخرجش حية
